原创 马尚龙 海上梦叠

来源：大上海小龙弄

作者： 马尚龙

沪语改写：冯济民

诵读：俞颖

文字修正及推荐：丁迪蒙

编辑：王乙其

中国有眼地方个小姑娘会拨以“妹”相称。比方，四川小姑娘叫做川妹，湖南小姑娘叫做湘妹，哈尔滨小姑娘可以叫做哈妹。感觉浪向，迭些地方个小姑娘样子就像伊拉家乡个山清水秀。有眼地方个小姑娘拨叫做“妹子”，好像就有了眼刚性搭仔爽朗。妹子也还是妹个意思，侪是单音节词，勒伊拉个家乡，显得邪气亲切个。

勒上海，却勿好用单音节词称“妹”个，“上海妹”，搿是邪气侮辱人个称呼；也呒没叫做上海妹子个，好像刚刚从幺二角落乘仔部长途汽车到了上海一样。

上海小姑娘要以双音节词去称呼：妹妹。当然迭是老早了。叫起妹妹来，勿像是越剧《红楼梦》里贾宝玉叫林妹妹，两个“妹”侪读得重，上海人个“妹妹”，第一个“妹”读重，是阴平声，还要带点拖音，第二个“妹”，读轻点，要带过去。

作家孔明珠有本书，书名就是《上海妹妹》。迭个，并勿是孔明珠对上海小姑娘个定义，而是伊作为一个曾经个“上海妹妹”，对上海迭座城市搭迭个城市个女小囡之间个柔软、互动个忆旧。邪气好看，也邪气好销。

忆旧个是上海个俗常女小囡个俗常生活。尤其是1980年代以来，上海女小囡个风情搭规矩，眼界搭尴尬，灵秀搭内敛，细腻搭隐忍，好像只有“妹妹”迭个称谓再贴切于上海。

迭个“妹妹”，阿拉是听得到个。就勒隔音勿算忒好个隔壁搭仔楼下头，就勒弄堂里向，外头人是听勿出啥个区别个，只有姆妈搭囡儿心心相印，一声声略带拖音个“妹妹”，是弄堂市井个轻音乐。

迭一个“妹妹”，阿拉是看得到个。伊个背仔书包搭女同学手搀手、勒弄堂里蹦蹦跳跳个，伊个带仔男朋友回来、羞答答个穿过弄堂乘风凉个邻居夹道欢迎个，伊个总归是可以拿最时髦个、穿戴修饰最巧妙个散落勒自家身浪个……是弄堂市井个水粉画。

迭个“妹妹”还是阿拉认得个。伊个长得娇小却是做了阿拉小学中队长、大队长个，伊个青春期发育特别早个，伊个两用衫外头总归是戴副袖套个，伊个老早就开始帮爷娘操持家务个……是弄堂市井两性关系个风俗人伦。

上海妹妹个过来之人，再能够把握牢上海妹妹个情结。有趟看电视，刚好看见孔明珠勒讲小辰光屋里吃蟹个故事。夜快头，爸爸回来，一只手拎仔只包，一之手拎仔串大闸蟹，到了门口头，两只手腾勿出来，就叫了声：妹妹，来拎蟹。迭声“妹妹”，搭父爱有关，搭吃蟹也有关。勿管是对玫瑰细沙月饼个体会，还是对烫头发个勇敢，或者是对电话妹妹个怜爱，所有个场景非上海莫属，非上海妹妹莫属呀。

———————————————————————————————

作者： 马尚龙

诵读：俞颖

——————————————————————————————

丁迪蒙

迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。

沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。

沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。

丁迪蒙所撰写的，与沪语相关的著作主要有：

《学说上海话》上海科技文献出版社

《听听说说上海话》少年出版社

《实用沪语》复旦大学出版社

《上海话绕口令》少儿出版社

《上海方言词语使用手册》上海教育出版社

《上海话读成语故事》少儿出版社

《囡囡学童谣》，少儿出版社。

————————————————————————————

欢迎大家关注丁老师的另一沪语平台：启迪心田沪语

原标题：《上海个“妹妹”情结》

阅读原文